Ataatsimoorussamik maleruagassat

Inuussutissarsiutinik ilinniagaqartut ineqarfiisa ataatsimoorussamik maleruagassaat Sanaartornermik Ilinniarfiup ineqarfiutaanut atuupput.

Ataatsimoorussamik maleruagassat:

1. Kammalaatinut sulisunulluunniit nukiiserneq nukiisernissamilluunniit sioorasaarineq ineqarfimmiit ingerlaannaq anisitaanermik kinguneqassaaq.
2. Ineqarfimmi ikiaroornartunik peqarneq atuinerluunniit ingerlaannaq anisitaanermik kinguneqassaaq (nakorsaatit kisiisa pinnagit).
3. Aserorterineq tillinniarnerlu allakkatigut mianersoqqussummik kiisalu taarseeqqusinermik kinguneqassapput. Ingasattumik pisoqartillugu tamanna ingerlaannaq anisitaanermik kinguneqassaaq.
4. Immiaaqqanik, viinninik imigassanillu atuineq allanut akornutaassanngilaq.
5. Aallaasit ineqarfimmi inerteqqutaapput.
6. Ineqarfimmi uumasuuteqartoqaqqusaanngilaq.
7. Ulluinnarni nal. 23.00 eqqissisoqarsimassaaq.
8. Siumut isumaqatigiissuteqartoqarneratigut aatsaat pulaartut ineqarfimmi tukkusorineqarsinnaapput.
9. Najugaqartut pisussaaffigaat najugaqartut sinniisaasa assigisaasaluunniit ataatsimiinneranni peqataassallutik.
10. Iserternermi 200 kr.-nit sallunaveeqqutitut akiliutigineqassapput, matuersaatip ineeqqallu eqqiarneqarsimasup amigaateqanngitsullu utertinneranni tunniuteqqinneqartussat.

Malittarisassani immikkut pineqaatissiinissamik taaneqarsimanngitsumik unioqqutitsisoqartillugu, unioqqutitsinerit oqaasiinnakkut ataasiarluni mianersoqqussutigineqartassapput, arlaleriarlunilu unioqqutitsinerit allakkatigut mianersoqqussutigineqartassallutik, maleruagassanillu unioqqutitsinernut naggammik pineqaatissiineq tassaassalluni atuartup anisinneqarnera. Mianersoqqusinerit anisitsinerillu piffissamik killiligaasinnaapput.

Aalajangiinerit Ilinniartitaanermut Pisortaqarfimmut naammagittaalliutigineqarsinnaapput

Najugaqartut sinniisaat

Ineqarfimmi najugallit oqaloqatigiittarnissaat ikioqatigiittarnissaallu pingaartuuvoq. Tamanna ilaatigut pisarpoq najugaqartut sinniisaat aqqutigalugit.

Najugaqartut sinniisaannut ilaasortaasarput blok-init tamanit aallartitaq ataaseq sinniisussamaallu ataaseq.
Najugaqartut sinniisaasa siulersuisussatik taakku akornannit nammineq qinertarpaat.

Atuartut ineqarfimmi najugallit ineqarfimminni toqqissisimanissaat najugaqartut sinniisaasa ineqarfimmilu sulisut peqatigiillutik isumagisarpaat. Najugaqartut sinniisaasa ilaatigut suliassaraat ineqarfimmi najugallit sunngiffimminni sammisinnaasaannik piareersaaneq.

Ineqarfimmi sunngiffik

Sanaartornermik Ilinniarfiup ineqarfiutaa sunngiffimmi sammisassanik arlalinnik peqarpoq. Ineqarfimmi najugallit ini isersimaartarfik, ini fjernsynertarfik inilu atuartarfik piumalleraangamik atorsinnaavaat.
Inini tamanit atorneqarsinnaasuni assigiinngitsunik pinnguaateqarpoq, taakkulu ineqarfimmi nujagaqartut siunnersuuteqarneri malillugit akuttunngitsumik allanik taarserneqartarput. Ineqarfimmi ilaatigut pigineqarput nerrivik billiard-ertarfik aamma nerrivik bordtennis-ertarfik.

Silami sammineqarsinnaasunut tunngatillugu ineqarfimmi najugaqartut - annikitsumik akiliuteqarallarnikkut - sisoraatinik sangusaarutinik ujakkaarutinillu, aammattaarlu mountainbike-inik attartorsinnaapput.

Ineqarfimmi najugaqartut ataatsimoorlutik sammisassaat assigiinngitsut ineqarfimmi najugaqartut sinniisaasa piareersarlugillu ingerlattarpaat.